இந்து பெண்ணை கடத்தி மதமாற்றம் செய்து மனித வெடிகுண்டாக மாற்றிய தீவிரவாதிகள்

இந்து பெண்ணை கடத்தி மதமாற்றம் செய்து மனித வெடிகுண்டாக மாற்றிய தீவிரவாதிகள்

கடந்த ஏப்ரல் 21-ம் தேதி ஈஸ்டர் பண்டிகையின்போது இலங்கையின் 3 தேவாலயங்கள், 3 நட்சத்திர ஓட்டல்கள் உட்பட 8 இடங்களில் சக்திவாய்ந்த குண்டுகள் வெடித்தன. இதில் 257 பேர் உயிரிழந்தனர். 500-க்கும் மேற்பட்டோர் படுகாயம் அடைந்தனர்.

இந்த தாக்குதலை நடத்திய தற்கொலைப் படை தீவிரவாதிகளின் படங்களை இலங்கை போலீஸார் வெளியிட்டனர். இதில் புலஸ்தினி மகேந்திரன் என்ற இந்து தமிழ் பெண்ணின் படமும் இடம்பெற்றிருந்தது. அந்தப் பெண் மட்டக்களப்பு தேத்தாத்தீவு பகுதியைச் சேர்ந்தவர். இதுதொடர்பாக புலஸ்தினியின் தாய் கவிதா மகேந்திரன் கூறியதாவது: எனது மகள் புலஸ்தினி பள்ளி, கல்லூரி படிப்பில் தொடர்ந்து முதலிடம் பிடித்து வந்தார். கல்லூரியில் படித்தபோது அச்சி முகமது ஹஸ்தும் என்பவர் எனது மகளை காதல் வலையில் வீழ்த்தி கடத்திச் சென்றுவிட்டார். பின்னர் அவளை மதம் மாற்றம் செய்து சாரா என்று பெயர் சூட்டியுள்ளனர். கடைசியாக மனித வெடிகுண்டாக மாற்றி அவளது உயிரையே பறித்துவிட்டனர். இவ்வாறு கண்ணீருடன் அவர் தெரிவித்துள்ளார்.

இலங்கையின் நீர்க்கொழும்பு தேவாலயத்தில் நடத்தப்பட்ட தாக்குதலில் புலஸ்தினியும், அச்சி முகமது ஹஸ்தும் தற்கொலைப்படை தீவிரவாதிகளாக வெடித்துச் சிதறியுள்ளனர் என்று போலீஸார் தெரிவித்துள்ளனர்.

இதுதொடர்பாக இலங்கை தமிழர் அமைப்புகளின் பிரதிநிதிகள் சிலர் கூறியபோது, ‘‘காதல் என்ற பெயரில் தமிழ் பெண்களை மதம் மாற்றுகின்றனர். பின்னர் அவர்களை மூளைச் சலவை செய்து தீவிரவாதிகளாக்கிவிடுகின்றனர். அண்மையில்கூட மதமாற்றம் செய்யப்பட்ட ஒரு தமிழ் பெண், தன்னை காப்பாற்றுமாறு சமூகவலைதளத்தில் வேண்டுகோள் விடுத்துள்ளார். ‘லவ் ஜிகாத்' என்ற பெயரில் இந்து பெண்களை மத மாற்றம் செய்வதை தடுக்க வேண்டும்’’ என்று தெரிவித்துள்ளனர்.